Kuçovarët do t’i bëjnë të gjitha përpjekjet për t’u ngjitur në vendin e dytë
 
Kuçovarët janë duke u përgatitur për fazën e dytë të kampionatit dhe në testet e deritanishme janë paraqitur mirë. Pritet një Naftëtar më rezultativ në fazën e dytë, që do të luftojë fort për të zënë një vend në dyshen e parë. Këtë fakt e pohon edhe kapiteni Arben Gega, i cili shpreson që edhe në ndeshjet zyrtare Naftëtari të ketë një ecuri pozitive: “Jemi në kulmin e përgatitjeve, madje do të thosha se jemi në rrugë të mbarë.  
 
Në miqësoret që kemi zhvilluar, kemi treguar se jemi duke punuar mirë për fazën e dytë të kampionatit. Natyrisht që për ne ka shumë punë për të bërë, pasi jemi ende në procesin e minifazës së dimrit. Kemi për të zhvilluar edhe disa ndeshje të tjera miqësore deri në fillimin e fazës së dytë, ku besoj se do të konsolidohemi plotësisht. Pavarësisht nga pozicioni aktual në tabelë, i kemi kushtuar rëndësinë e duhur fazës së dytë të kampionatit. Mendoj se me kontigjentin aktual skuadra do të tregojë vlera,” - thekson kapiteni Gega.  
 
Ai e pranon me tej se objektivi parësor për ngjitjen në kategorinë e parë është shumë i vështirë për t’u realizuar. Sipas Gegës, kjo vjen nga pozicioni që Naftëtari ka pas fazës së parë. “Pavarësisht vështirësive, mendoj se me një përqendrim e mobilizim maksimal, mund ta përballojmë me sukses fazën e dytë.  
 
Distanca me skuadrat e vendeve të para është relativisht e madhe, por ne do t’i bëjmë të gjitha përpjekjet për ngjitjen në kategorinë e parë. Në krahasim me fazën e parë, besoj se jemi më mirë. Pa dyshim që do të kemi një Naftëtar më të konsoliduar në të gjitha drejtimet,” - ka thënë në fund kapiteni i kuçovarëve, Arben Gega.
 
 
Futbollisti kuçovar Ergys Alushi e pranon se skuadrës i duhen 2-3 elementë cilësorë
 
Pavarësisht shanseve të pakta për ngjitjen në kategorinë e parë, kuçovarët po e vlerësojnë seriozisht fazën e dytë. Përgatitjet e tyre kanë filluar shumë shpejt, që në ditët e para të këtij viti. Pasi është punuar në aspektin fizik, tani stafi do të shohë më tepër anën tekniko‑taktike, duke zhvilluar edhe ndeshje miqësore.
 
Sipas drejtuesve të Naftëtarit, të gjitha ndeshjet miqësore që janë programuar, do të zhvillohen jashtë qytetit, pasi do të jenë në funksion të ndeshjes së parë të fazës së dytë, që do të luhet në fushën e Luzit. Ndërkohë, kontigjenti i futbollistëve të fazës së parë nuk ka ndryshuar, teksa pretendohet për disa përforcime.  
 
Ergys Alushi, si shumë futbollistë të jerë të Naftëtarit, mendon se duhen patjetër disa përforcime cilësore. Skuadra kuçovare u mbështet gjatë fazës së parë tek elementi vendës, por është e qartë se për të pretenduar, duhen edhe disa elementë të tjerë.  
 
“Po punojmë intensivisht gjatë kësaj periudhe, me qëllim që të jemi në gjendje ta përballojmë me sukses fazën e dytë të kampionatit. Jemi të distancuar në pikë me skuadrat e kreut, sidomos me vendin e parë, por e kemi vlerësuar procesin stërvitor, pasi gjithçka mund të ndodhë.  
 
Pozitiv është fakti se gjatë kësaj periudhe nuk ka pasur largime futbollistësh nga Naftëtari. Mendoj se grupi i fazës së parë është konsoliduar, gjë që e treguan dhe ndeshjet e fundit. Megjithatë, për të qenë realistë, duhet ta pranojmë se nuk mund të pretendojmë për vendin e dytë, nëse nuk bëhen disa përforcime. E dimë të gjithë se faza e dytë do të jetë më e vështirë në të gjitha drejtimet.  
 
Numri i skuadrave pretendente në grupin tonë është i madh dhe për të sfiduar rivalët duhet një grup sa më i kompletuar. Naftëtarit i duhen 2-3 lojtarë me kualitet, që të arrijë rezultate pozitive. Ne futbollistët kemi për detyrë të stërvitemi sistematikisht, ndërsa me merkaton merren drejtuesit e Naftëtarit. Do të ishim shumë të kënaqur nëse ata do ta përforconin skuadrën me disa elementë cilësorë,” - ka theksuar për “Sportin shqiptar” futbollisti Alushi.
 
 
Fraholli: Naftëtari po punon për të ardhmen
 
Trajneri kuçovar, Barjam Fraholli, pranon gabimet, por thotë se në rezultate ka ndikuar shumë dhe gjykimi
 
Për kuçovarët ka përfunduar java e parë e përgatitjeve dimërore dhe, sipas stafit, për shkak të mundësive të pakta financiare, ajo do të vazhdojë në ambientet sportive të qytetit. Pas ushtrimeve për përmirësimin e parametrave fizikë, do të nisë puna me taktikën.
 
Pa dyshim që do të ketë edhe disa ndeshje miqësore, për të cilat është menduar të jenë në transfertë, në funksion të ndeshjes së parë të fazës së dytë, por edhe për të mos dëmtuar fushën e stadiumit “Bashkim Sulejmani”. Më me detaje për gjendjen e skuadrës dhe për ecurinë e përgatitjeve flet trajneri Barjam Fraholli, i cili e ka marrë drejtimin e Naftëtarit në mesin e kampionatit që shkoi. Pas karrierës së pasur si lojtar, Fraholli kërkon të jetë i suksesshëm edhe në rolin e trajnerit, por e pranon se është e vështirë që jo vetëm Naftëtari, por edhe futbolli shqiptar të ngjitet në nivelet e dikurshme.
 
“Patëm mangësi që në fillim dhe skuadra ishte e ngurtë. Ndoshta edhe për shkak të grupit, që përbëhej nga lojtarë me moshë të re dhe thuajse i rinovuar në krahasim me grupin e kampionatit të kaluar. Megjithatë, duke lënë pas fillimin e dobët, Naftëtari u përmirësua dhe nuk munguan rezultatet pozitive. Natyrisht që nuk jemi të kënaqur me pozicionin që kemi në renditje, sepse duhej të ishim pranë kreut. I pranojmë gabimet, por mendoj se na kanë ndëshkuar edhe gjykimet në disa ndeshje, duke ndikuar në rezultatin final. Të paktën në tri ndeshje, në ato me Mamurrasin, Erzenin dhe Egnatian, gjykimi ishte skandaloz.  
 
Nëse do të kishim gjykimet të drejta, pretendimet tona për ngjitjen në kategorinë e parë do të ishin evidente,” - thekson mes të tjerash trajneri Fraholli. Ai pohon se faza e dytë, pavarësisht shanseve të pakta, po vlerësohet maksimalisht. Trajneri Fraholli e pranon se objektivi për rikthimin në kategorinë e parë është tepër i vështirë: “Do të përpiqemi të bëjmë një paraqitje dinjitoze në fazën e dytë. Por duhet të mendojmë e punojmë edhe për të ardhmen, sepse perspektiva e futbollistëve është shpresëdhënëse,” - përfundoi trajneri Fraholli.
 
Autori: Arben Cepani

Naftëtari
 
Në kampin kuçovar vazhdojnë përgatitjet për sezonin e ri. Optimizmi për të përballuar me sukses ndeshjet e kampionatit nuk mungon, të paktën deri më tani, e sipas stafit teknik gjendja në përgjithësi është mirë. Në fakt, përpara disa ditëve djemtë e trajnerit Vasili kanë zhvilluar një ndeshje miqësore me U-19, në të cilën kanë arritur të triumfojmë. Mirëpo kreu i pankinës kërkon më shumë teste, deri në startimin e kampionatit, për të parë më mirë gjendjen e skuadrës së tij, por për fat të keq momentalisht alternativat për të gjetur kundërshtarë për miqësore janë minimale. Pikërisht për këtë arsye, stafi teknik kuçovar shprehet i shqetësuar: “Pavarësisht se përgatitjet për kampionatin e ri, - nënvizon Vasili, - po ecin me ritmin e duhur, ne na duhen patjetër ndeshjet miqësore, për të kompletuar punën që po bëjmë në kuadrin e përgatitjeve për kampionatin e ri”.            
 E.Baku