Dhunon drejtorin e spitalit, i hoqën gruan nga puna
 
04/06/2010 -Gazeta Metropol
 
KUÇOVË- Largimi i të shoqes nga puna është bërë shkak që një 59-vjeçar nga Kuçova të dhunojnë fizikisht drejtorin e spitalit ku kish punuar si sanitare bashkëshortja e tij. Burime të policisë së qarkut të Beratit bëjnë me dije se mbrëmjen e djeshme është bërë ndalimi i Pasho Kapxhiut, 59 vjeç, banor i lagjes “1 Maji” në qytetin e Kuçovës. Ndalimi i tij ka ardhur pasi pasditen e djeshme ka goditur dhe ka fyer për shkak të detyrës drejtorin e spitalit Kuçovë. Ky i fundit pasi ka rënë preh e ofendimeve dhe dhunës në qendër të qytetit ka kërkuar ndihmën e policisë, çka solli dhe ndalimin e 59-vjeçarit. Policia mësoi se shkak i kësaj grindje është bërë vendimi i drejtorit për largimin nga puna të bashkëshortes së 59-vjeçarit.  

Transportonin 64.5 kg Cannabis, tre persona në pranga, tre në kërkim
 
BERAT - Trafiku i drogës ka çuar në pranga tre persona mbrëmjen e djeshme, ndërsa tre të tjerë janë në kërkim. Operacioni i policisë është zhvilluar në qytetin e Beratit dhe në pranga janë vënë të dyshuarit. Burime nga uniformat blu thanë se në këtë aksion janë bllokuar 64.5 kilogramë Cannabis sativa, që ishin duke u transportuar në dy makina. Aksioni është organizuar nga Policia e Beratit, në bashkëpunim dhe me Drejtorinë e Përgjithshme të Policisë. Burime nga policia bënë me dije se u arrestuan Vladimir Shkëmbi nga Çorovoda 33 vjeç, Asllan Fetiu 22 vjeç nga Berati dhe Alket Canka 33 vjeç nga Përmeti. Të tre u arrestuan në Urën Vajugore. Ndërsa Dorian Muho 22 vjeç, Arben Shahu 26 vjeç nga Kuçova, Xhezmi Shkëmbi nga Berati 48 vjeç mundën ti shpëtonin aksionit të policisë. Burime nga policia lokale thanë se hetimet ndaj të ndaluarve kishin filluar disa muaj më parë. Kishin qenë informacionet e marra në rrugë operative që kanë çuar uniformat blu në zbulimin e këtij rrjeti trafiku. Dyshimet janë se, droga është kultivuar në një nga fshatrat e Beratit dhe ishte duke u transportuar drejt Fierit. Destinacioni përfundimtar i sasisë prej 64.5 kilogramësh Cannabis sativa nuk është bërë i ditur.  
 

Kucovë, punonjësit e bashkisë dhurojnë gjak për talasemikët
 
BalkanWeb
 
KUÇOVË- 38 punonjës të Bashkisë së Kuçovës i janë bashkuar për të katërtin vit radhazi nismës për dhurimin e gjakut. Paraditen e sotme ata u janë nënshtruar analizave e më pas kanë dhuruar gjak vullnetarish. Dhurimi i gjakut për seicilin nga punonjësit e administratës është kryer në sallën e mbledhjeve të këshillit bashkiak të këtij institucioni.
 
Procesi i dhurimit të gjakut ka vijuar për rreth 3 orë brenda ambienteve të Bashkisë, ku edhe ishte vendosur i gjithë personeli mjekësor i nevojshëm i qëndrës së dhurimit të gjakut ndërkohë që e gjithë sasia pritet të shkojë në ndihmë të fëmijëve talasemikë.

Ujë të pastër për Beratin dhe Kuçovën  
 
Qeveria gjermane financon projektin e ujësjellësit
 
Përmirësimi i jetës së përditshme të njerëzve në qytetet e vogla e zonat rurale përbën një nga objektivat e realizimit të projekteve të Gjermanisë në Shqipëri. Me një investim prej 11,2 milionë eurosh banorët e Beratit dhe të Kuçovës do të kenë një ujësjellës të ri që do të çojë në rubinetet e çezmave të tyre ujë të kontrolluar nga pikëpamja higjenike. Ute Rodrian, Drejtore Rajonale e Bankës gjermane KFW, tregon se çfarë synohet të arrihet me këtë projekt. “Me këtë projekt në Berat dhe në Kuçovë po mbështesim kompaninë rajonale të ujësjellësit. Qëllimi i projektit është t'u sigurojë klientëve në të dyja qytetet ujë të mirë, që do të thotë ujë me cilësi dhe në kushte të pranueshme higjenike. Kjo do të reflektohet më pas në zhvillimin e qëndrueshëm të kompanisë së ujësjellësit, në rritjen e numrit të klientëve të saj që do të kenë furnizim të mjaftueshëm me ujë. Dhe kjo për të gjithë banorët e zonës Berat – Kuçovë.”  
 
Bogova burim uji për Beratin dhe Kuçovën
 
Partnerja më e rëndësishme e bankës gjermane KfW në realizimin e këtij projekti është kompania rajonale e ujësjellësit Berat-Kuçovë. Drejtori i saj, Fatmir Shehu, thotë se do të kryhen punime me nivel dhe material bashkëkohor. “Punëtorët e saj do të shtyrojnë 12,5 km linjë transmetimi të ujit me tuba gize, me diametër 300 mm, që uji të shkojë nga burimi i Bogovës, në rrëzë të malit Tomorr, në Berat, dhe që atje në Kuçovë. Bogova është një burim i mrekullueshëm natyror me ujë të ftohtë dhe të pastër që me përfundimin e projektit do të furnizojë me ujë të dyja qytetet” thotë Fatmir Shehu. Projekti i ristrukturimit të linjës së ujësjellësit Berat- Kuçovë pritet të përfundojë pas një viti.  
Përmirësim i jetës së përditshme, zhvillim i qëndrueshëm ekonomik  
Projekti është pjesë e marrëveshjes së bashkëpunimit financiar mes qeverisë gjermane dhe asaj shqiptare, ku qeveria gjermane ka dhënë, përmes bankës KfË një fond prej 174 milionë eurosh vetëm në sektorin e furnizimit me ujë. Nga projektet gjermane në këtë sektor banorët e Krujës, Kavajës, Korçës dhe Pogradecit tani kanë rrjet modern ujësjellësash dhe furnizim 24 orë me ujë. Për Ute Rodrian qëllimi i investimeve në sektorin e ujit drejtohet nga një filozofi sociale që përmbledh edhe synime të tjera afatgjata, me objektiv kryesor përmirësimin e kushteve të jetesës dhe të ruajtjes së shëndetit. Rodrian: "Në të njëjtën kohë me këtë projekt ne mbrojmë mjedisin, ndihmojmë që Shqipëri të arrijë standarde ndërkombëtare dhe që kompanitë e ujësjellësve të kenë zhvillim të qëndrueshëm. Pra fokusi ynë kryesor është që njerëzit të përfitojnë nga këto projekte, por njëkohësisht të ndihmojmë në zhvillimin e qëndrueshëm ekonomik të Shqipërisë. Kjo është shumë e rëndësishme.” Në sajë të këtij objektivi qeveria gjermane ka mbështetur financiarisht në Shqipëri projekte jo vetëm në sektorin e furnizimit me ujë të popullsisë por edhe në atë me energji elektrike ku ka financuar deri tani projekte me një vlerë prej rreth 240 milion euro. Kjo pasi sektori i energjisë nuk është i rëndësishëm vetëm për jetën e përditshme të njerëzve por edhe për rritjen ekonomike të vendit dhe për zhvillimin e qëndrueshëm të ekonomisë së tij.  
 
Qeveria gjermane jep fonde shtesë për Shqipërinë  
Arritja e këtij synimi madhor ka sjellë edhe zotimin e qeverisë gjermane për fonde shtesë. Pritet që Gjermania t'i akordojë qeverisë shqiptare fonde shtesë lidhur me projektet e ardhshme. Njëri nga ato në sektorin e ujit është ai i infrastrukturës bashkiake ku përfshihet Fieri, Gjirokastra, Lezha dhe Saranda. Ute Rodrian shpreson që KfW të nënshkruajë shumë shpejt marrëveshjen e huasë me qeverinë e Shqipërisë, në mënyrë që projekti të fillojë shumë shpejt nga puna, ashtu siç pritet. KfW mendon që të financojë atë që njihet si “master plani për ujin”, që ndihmon qeverinë të identifikojë dhe të japë prioritet nevojave të investimeve në këtë sektor, dhe mbi këtë bazë të hartojë programe që mund të financohen jo vetëm nga KfW por edhe nga donatorë të tjerë, thotë Rodrian.  
 
Marre nga Deutche Welle
 

Dy në pranga, me drogë e eksploziv
 
KUÇOVE – Kontrolli për drogë u zbulon edhe një automatik e kallëpe me tritol. Dy të rinj u arrestuan dje nga policia e komisariatit të Kuçovës, pasi iu gjetën 1.6 kg lëndë narkotike, kanabis sativa. Policia bëri të ditur dje, se në kuadër të operacionit “Dion” u prangos Spiro Pando, 21 vjeç, (i cili ishte në masën e sigurisë detyrim paraqitje për veprën penale të shkatërrimit të pronës dhe prishjes së rendit) si dhe David Shehu, 19 vjeç, i dënuar më parë për moskallëzim krimi. Pas informacioneve që policia kishte, forcat e saj ushtruan kontroll në garazhin e të atit të Pandos. Aty u ndaluan dy të rinjtë me lëndën narkotike. Kontrolli i mëtejshëm zbuloi edhe një automatik, 34 fishekë dhe 6 kallëpe me lëndë eksplozive, të dyshuara si tritol.

Remontet, bizneset ankesë OSSH-së  
 
Ndërprerja e energjisë elektrike prej tri ditësh rresht ka paralizuar veprimtarinë e zonës industriale në ish-Kombinatin e Beratit. Në këtë zonë ndodhet e gjithë industria e qarkut të Beratit, si punishtet e ndryshme, ato të prodhimeve të konfeksioneve, fabrika të prodhimeve ushqimore, etj. Ndonëse janë paralajmëruar më parë për shkëputjet e energjisë, sipërmarrësit e këtyre bizneseve pohojnë se orari i ndërprerjes është nga ora 09:00 deri në orën 16:00. Kjo periudhë korrespondon me kohën më aktive të punës në këto ndërmarrje dhe kufizimi i energjisë u shkakton dëme të mëdha. Për këtë shkak, pronarët e tyre kërkojnë nga OSSH-ja që të ndryshojnë orarin e remonteve. Ata thonë se kërkojnë nga OSSH-ja që remontet të kryhen në një kohë tjetër, duke ofruar si zgjidhje orarin e pasdites, pasi cikli i punës i këtyre fabrikave është i përqendruar gjatë paradites, kur është e pranishme dhe forca punëtore. Dje, pronarët e fabrikave i kanë kërkuar prefektit të Beratit, Bujar Hoxha, që të ndërhyjë pranë OSSH-së, në mënyrë që të gjenden orare të tjera për kryerjen e remonteve. Prefekti ka pohuar se do të ndërhyjë për këtë pranë OSSH-së menjëherë, pasi aktualisht po kryhen punime për sistemimin e rrjetit të energjisë elektrike. Këtë problem e kanë shfaqur edhe ndërmarrjet e naftës në Kuçovë, pasi mungesa e energjisë ka bërë që të ndryshohet orari i punës. Punëtorët thonë se e nisin në 06:00 të mëngjesit deri në 09:00, për të vazhduar më pas në orët e pasdites, deri në orën 21:00 për të plotësuar normën e punës dhe vazhdimin e prodhimit mekanik dhe nxjerrjes së naftës.